Imitegurire mibi mu mikino ya FEASSA iratanga isura mbi ku Rwanda

Abakinnyi bambikiwe imidali muri Sitade mu myanya yagenewe abafana

Mu Karere ka Musanze harabera imikino mpuzamashuri y’aka Karere izwi ku izina rya “FEASSA” nubwo ari ubwa gatatu u Rwanda rwakira iyi mikino, ariko iya 2018 ni yo ngo yaranzwe n’imitegurire mibi.

Umwe mu batoza uri i Musanze wavuganye n’ikinyamakuru impamba.com yavuze ko mu mikino ya FEASSA ibera i Musanze imitegurire yayo ari akavuyo gusa ari na yo mpamvu inzego nyinshi zinjiyemo kugira ngo isura y’igihugu idakomeza kugaragara nabi, ati “kubera imitegurire mibi byabaye ngombwa ko igisirikare n’igipolisi n’inzindi nzego z’igihugu zinjira muri iyi mikino”.

Uwatanze aya makuru yavuze ko kimwe mu bibazo biza ku isonga mu kugaragaza ko imyiteguro y’imikino ya FEASSA yagenze nabi ari ibibuga bidakoze neza, ibindi ni ibura by’ibikoresho bimwe na bimwe mu mikino ngororangingo (Athletics).

Ni uku abakinnyi b’imikino ngororamubiri bahembwe habaho no gufata ifoto y’urwibutso

Hari imikino ngororamubiri yabaye, abakinnyi bitwaye neza babura aho bahagarara (podium) hagaragaza uwa mbere, uwa kabiri n’uwa gatatu mu gihe cyo gutanga imidali, biba ngombwa ko bahagarara aho abaje kureba umupira w’amaguru muri Sitade Ubworoherane bicara. Mu marushanwa yo gusimbuka (saut) ibikoresho byabugenewe byarabuze bifashisha za Matela abantu baryamaho kugira ngo abasimbuka bajye bazigwaho.

Ngizo matela zifashishijwe mu gusimbuka

Ikindi kivugwa muri iyi mikino ni uko abatekinisiye batishimiye insimburamubyizi bahabwa ku munsi y’ibihumbi cumi na bitanu (15,000Frs) bakaba batumva impamvu amafaranga bahabwaga kera yagabanyijwe.

Hari abashobora kuba batawe muri yombi bazira imikino ya FEASSA

Amakuru agera ku kinyamakuru impamba.com avuga ko hari umwe mu bakozi b’Akarere ka Musanze (izina rye ntiryatangajwe) waba wamaze gutabwa muri yombi azira kudakora imirimo yagombaga gukora mu mikino ya FEASSA bityo amafaranga yahawe ntiyayakoresha ibyo yagenewe.

Andi makuru avuga ko nyuma y’uwo mukozi hari n’abandi bazatabwa muri yombi bazira imigendekere mibi ya FEASSA u Rwanda rwakiriye ku nshuro ya gatatu.

Imikino ya FEASSA nk’inzira yo kuzamura ubukire bw’abantu ku giti cyabo kuruta kuzamura impano z’abakinnyi b’Abanyarwanda

Umwe mu bavuganye n’ikinyamakuru impamba.com uri i Musanze yavuze ko iyi mikino ya FEASSA izasiga bamwe mu mifuka yabo hazamutse mu gihe ahubwo impano z’abakinnyi ari zo zakagombye kwigaragaza. Yavuze ko imikorere mibi iri muri iyi mikino yaba ifitanye isano no kuba amafaranga atarakoreshejwe icyo yagenewe kuko iyi mikino ibamo ingengo y’imari itubutse.

Ni uwuhe musaruro ugiye kugaragara muri FEASSA nyuma y’uko MINEDUC yinjiye mu mikino

Bimenyerewe ko Ishyirahamwe (Federation) ritegura irushanwa Minisiteri ikaritera inkunga nyuma hakabaho gutanga raporo y’icyo amafaranga yakoreshejwe, ariko mu mikino ya FEASSA ya 2018 si ko byagenze, kuko igikorwa cyabaye nk’ikivuye mu maboko y’Ishyirahamwe ry’Imikino y’Abanyeshuri (Interscolaire) mu Rwanda kiba icya Minisiteri y’Uburezi (MINEDUC)

Icyo ubuyobozi buvuga kuri iki kibazo

Ikinyamakuru impamba.com cyahamagaye Dr Isaac Munyakazi Umunyamabanga wa Leta Ushinzwe Amashuri Abanza n’Ayisumbuye ku murongo we wa telefone ntiyaboneka ndetse n’ubutumwa bugufi (SMS) yohererejwe ntiyigeze abusubiza kugeza ubwo iyi nkuru yatangajwe.

Nihagira icyo ubuyobozi buvuga kuri aya makuru murakigezwaho.

Leave a Reply

Your email address will not be published. Required fields are marked *

Scroll Up