Mu rubanza rwamaze umwanya muto kuri uyu wa Kane tariki ya 26 Mata 2018, ubushinjacyaha bwavuze ko impunzi z’Abakongomani zabaga mu nkambi ya Kiziba mu Karere ka Karongi zakomeza gufungwa indi minsi 30 y’agateganyo kugira ngo burangize iperereza ku byaha zishinjwa.
Izo mpunzi 21 z’abagabo zo mu nkambi ya Kiziba kuri ubu, zifungiwe muri gereza ya Muhanga, zose zari mu mwambaro w’imfungwa
Zari zitabye umucamanza w’urukiko rwisumbuye rwa Muhanga ku nshuro ya 3
Ubushinjacyaha bwavuze ko bugikeneye kongererwa igihe cyo kurangiza neza iperereza.
Abaregwa n’ababunganira babwiye urukiko ko nta cyaha bafite, ko iminsi y’igifungo yarangiye kandi kuri ubu bari bafunzwe mu buryo butubahirije amategeko bityo bakaba batari bakwiye kuguma muri gereza.
Abaregwa basabaga kurekurwa kuko ngo ari impunzi zisanzwe zituye ahantu hazwi zitashobora gutoroka ngo zisubire iwabo muri Congo kandi hakiri n’umutekano muke.
BBC yakurikiranye iri burana, itangaza ko ubushinjacyaha buvuga ko bubafiteho impungenge zo kuba batoroka baramutse bafunguwe kandi ngo banica iperereza.
Abaregwa bose bavuze ko bari banajuririye icyemezo cyo gufungwa iminsi 30 mu rukiko rwibanze rwa Bwishyura muri Karongi, babanje kuregwamo.
N’ubwo urubanza rutaratangira mu mizi, abaregwa bose barimo n’abatumva Ikinyarwanda babwiye umucamanza ko ibyaha bashinjwa nta na kimwe bemera.
Izi mpunzi zo mu nkambi ya Kiziba mu byo zishinjwa harimo kurema umutwe w’iterabwoba binyuranyije n’amategeko y’u Rwanda.
Zinavugwaho kuba zarabaye ku isonga ry’abarwanyije inzego z’umutekano mu myigaragambyo yabereye mu nkambi mu minsi ishize.
Urukiko rwavuze ko urubanza ruzakomeza mu mpera z’uku kwezi kwa Mata.
