Amafoto: Ibintu 12 ushobora kuba utazi ku Mujyi wa Rio de Janeiro muri Brazil

Ku kibuga ni uku Abanyabrazil bagaragazaga ibyishimo mu gihe cy’imikino Paralempike (Ifoto/Bakomere P)

Mu gihe cy’imikino Paralempike, umunyamakuru w’impamba.com yasuye tumwe mu duce two mu mujyi wa Rio de Janeiro muri Brazil ndetse aganira n’umwe mu baturage baho, avuga bumwe mu buzima babamo.

Igihugu cya Brazil kibarizwa muri Amerika y’Amajyepfo, kigaragaramo abakire ndetse kikabamo n’abakene bakora imirimo iciriritse nko gucuruza imyenda ahahurira abantu benshi, gucuruza ibigori ku muhanda n’indi.

1.    Ishusho ya Yezu/Yesu muri Brazil yahuruje amahanga

Kimwe mu bimenyetso bigaragaza ko Abakristu Gatulika aribo biganje muri Brazil  mu Mujyi wa Rio de Janeiro ni ishusho nini ya Yezu cyangwa se Yesu iri ku musozi wa Corcovado ku buryo abantu bageze muri Brazil baharanira gutaha basuye iyo shusho.

Iyi shusho ni nini hafi yayo hari n’ahantu hato basengera (chapelle) ku buryo abantu batandukanye barimo n’Abayisiramu baje muri Brazil bwa mbere bagira amatsiko yo gusura iyo shusho.

Amafaranga  ya Metro ikugeza kuri iyo shusho no kuyireba ni 56 mu mafaranga ya Brazil hafi ibihumbi cumi na bine mu mafaranga y’u Rwanda.

Gusa iyi shusho ntawemererwa kuyisura mu gihe cy’ibihe bibi ni ukuvuga mu gihe cy’imvura cyangwa se mu muyaga bitewe n’imiterere y’aho kuko umuyaga ushobora gutwara umuntu.

Muri Brazil twaganiriye n’umwe mu baturage baho avuga ko Abakirisitu Gatulika ari bo biganje muri icyo gihugu, ariko hakaba n’andi madini afite abayoboke bake kimwe n’uko hari n’abadakozwa ibyo gusenga.

2. Muri Brazil ntibatanga inkwano

Mu gihe mu Rwanda bizwi ko mbere yo gushinga urugo ubanza kurambagiza umukobwa, nyuma ukumvikana n’ababyeyi be inkwano, muri Rio de Janeiro muri Brazil siko bimeze.

Uwitwa Guido Kuyvenhoven Pereira Gomes yabwiye impamba.com ko  amaranye n’umugore we imyaka irindwi ntankwano yatanze usibye ko mbere yamenyesheje ababyeyi b’umugore we ko yakunze umukobwa wabo bamwemerera kubana nawe. Gomes yagize ati “hano si ngombwa gutanga inkwano mbere yo kubana n’umugore, icyo ukora mu gihe mukirambagizanya umenyesha ababyeyi be ko wakunze umukobwa wabo nyuma mu kabana”.

3.Ubucuruzi buciriritse mu Mujyi wa Rio de Janeiro

Nubwo Brazil iri mu bihugu icumi bya mbere bikize ku isi, ariko ntibibujije ko mu Mujyi wa Rio de Janeiro uhasanga abakora ubucuruzi buciriritse abo mu Rwabda bakunze kwita “Abazunguzayi” aba usanga bagaragara hafi y’Inyanja ya Atlantique mu Mujyi ukomeye wa Copa Cabana. Muri aka gace uhasanga n’abacuruza ibigori bitetse ku muhanda. Ibi ariko ntibibujije ko imbere haba hari n’amazu akomeye acuruza imyenda agurirwamo n’abakomeye bityo bikaba bitoroshye kubona umuntu ukize agura umwenda wo ku muhanda.

Komite Olempike yo muri Brazil ifite inyubako yayo ikoreramo mu Mujyi wa Rio de Janeiro, mu gihe Komite Olempike y’u Rwanda (CNOSR) ikorera muri Sitade Amahoro i Remera.

Komite Olempike y’u Rwanda yigeze gutangaza ko ishaka kubaka inyubako yayo, ariko byaranghiriye mu magambo kuko hashize imyaka hafi itanu uwo mushinga utavugwa.

5. Inzira yihariye ku binyabiziga n’abanyamaguru

Mu mujyi wa Rio de Janeiro umuhanda uba ugabanyijemo ibice bitatu: Icya mbere kigizwe n’umuhanda ugendano imodoka zisanzwe, icya kabiri kigendamo Metro, icya gatatu ni agahanda gato kagendamo abanyamaguru n’abanyamagare.

Ku banyamaguru bifuza kwambuka umuhanda, baca ahari imirongo yabugenewe irimo ibara ry’umweru n’umukara, ariko haba hari na za “Feux Rouge” zikwereka ko ufite uburenganzira bwo guhita cyangwa gutegereza imodoka zikabanza gutambuka ziba zihuta ku buryo wibeshye ukinjira mu muhanda zakugonga.

Ikindi kigaragara mu mihanda ya Brazil, ni uko hari iyica munsi y’urutare ku buryo bigaragara ko ari imihanda ihenze mu kuyubaka.

6. Abanyabrazil bakunda kwidagadura

Abanyabrazil bakunze kubyina injyana ya Samba. Iyi njyana ikaba yaramamaye kuva mu kinyejana cya 16. Amateka avuga ko injyana ya Samba yazanwe muri Amerika y’Amajyepfo n’Abanyafurika igakundwa n’abantu batandukanye.

Mu gihe cy’imikino Paralempike Abanyabrazil barangwaga n’urugwiro ku bibuga, aho akenshi babaga babyina. Mu gihe cy’ikiruhuko cyangwa se mu mpera z’icyumweru (Weekend) bakunze kuba ku mazi hafi y’Inyanja ya Atlantica, aho usanga abagabo n’abagore bambaye uko babyumva batitaye kubareba baturuka mu bindi bihugu bitamenyereye uwo muco.

Usibye injyana ya Samba izindi njyana zikunzwe mu mujyi wa Rio de Janeiro ni Hip Hop na Rock.

7. Ntavangura rishingiye ku ruhu riba muri Brazil

Umuturage ubarizwa mu Mujyi wa Rio de Janeiro wavuganye na Izubarirashe.rw yatangaje ko nta makimbirane aba mu baturage ba Rio de Janeiro ashingiye ku ruhu, ahubwo usanga abakire baba ukwabo kubera ubusumbane mu by’ubukungu, ibyo bikaba bishobora gukurura umwuka mubi hagati y’abakire n’abakene.

8. Ntabakinnyi batorokeye muri Brazil

Akenshi mu gihe cy’imikino Olempike na Paralempike abakinnyi baturuka muri Afurika bakunze gusigara mu bihugu byakiriye iyo mikino, ariko muri Brazil muri Kanama na Nzeli icyo kibazo nticyabayeho.

Mu mikino Olempike na Paralempike yabereye i London mu Bwongereza, hari abakinnyi benshi baturuka muri Afurika barimo abo muri Congo Kinshasa n’Abanyarwanda babiri (usibye ko umwe ubuzima bwamunaniye akaruka mu Rwanda) basigaye mu Bwongereza.

Umuturage wa Brazil wavuganye n’impamba.com, yavuze ko impamvu abakinnyi benshi basigara mu Burayi na Amerika ari uko bazi ko hari ubukire kurusha muri Brazil ari nayo mpamvu nyamukuru yatumye ntabakinnyi basigaye mu Mujyi wa Rio de Janeiro.

9. Umwuka mubi hagati y’ubuyobozi bw’igihugu n’abaturage

Nubwo Brazil yakiriye imikino Olempike na Paralempike, ariko byagaragaraga ko hari ubwumvikane buke hagati y’ubuyobozi n’abaturage. Ibi bikagaragarira mu myigaragambyo abaturage bakoraga kugeza ubwo Perezida w’Igihugu yegujwe.

Kuba muri icyo gihugu hari ubwumvikane buke hagati y’ubuyobozi n’abaturage byatumaga umutekano urindwa mu buryo budasanzwe aho abasirikare bari benshi ku macumbi y’abakinnyi, ku bibuga no hirya no hino mu mihanda.

Muri Sitade ya Maracana, bamwe mu baturage na none hari aho bavugirije induru umuyobozi wari ukuriye komite yateguye imikino Parampike ubwo yafataga ijambo ryo kuyitangiza ku mugaragaro.

Abakorerabushake (Volunteers) mu mikino Paralempike wasangaga inshingano zabo bazikora neza, ariko abari hanze y’iyo mikino wabonaga ntacyo bibabwiye kuba igihugu cyabo cyarayakiriye, mu gihe muri 2012 i London mu Bwongereza wasangaga buri muturage yishimiye ko igihugu cye cyakiriye imikino Olempike na Paralempike.

Ngo ibibazo bya ruswa byavugwaga kuri bamwe mu bayobozi b’iki gihugu no kuba ubukungu butari bwifashe neza niyo yari nyirabayazana y’ubwumvikane buke hagati y’abaturage n’abayobozi babo.

10. Umwuka mubi mu baturage n’abayobozi ntiwatumye imikino Olempike na Paralempike itaba mu mahoro

Gusa nubwo hari ubwumvikane buke mu bayobozi n’abaturage kubera politiki n’imanuka ry’ubukungu (Economic  crisis), ariko iyo wageraga ku bibuga ntiwashoboraga kumenya ko hari ikibazo kiri mu gihugu kuko nta narimwe hagize ikibura aho abakinnyi bacumbitse (Village). Umwe mu baturage wa Brazil wavuganye na izubarirashe.rw yavuze ko abaturage ntakibazo bari bafitanye n’abaje mu mikino Paralempike ku buryo bari kubabangamira, ikibazo yari Perezida wabo ari we Dilma Vana Rousseff  kandi yegujwe kuwa 31 Kanama 2016.

11. Virus ya Zika kimwe mu byabanje kuba inzitizi ku mikino Olempike na Paralempike

Mbere y’uko imikino Olempike na Paralempike iba, habanje kuvugwa ko muri Brazil Virus ya Zika ihangayishije abaturage ndetse bimwe mu bihugu bitangira kuvuga ko bishobora kutitabira iyo mikino.

Umwe mu baturage wavuganye na izubarirashe.rw yavuze ko muri Brazil hari umubu utera Zika, ariko mu Mujyi wa Rio de Janeiro utahaba cyane, bityo habayeho amabyankuru kuri iyo Virus.

Uyu muturage yavuze ko hari n’ibindi bihugu birimo umubu utera Zika, ariko kuri Brazil habayeho gukabya ati “kuva kera muri Brazil habaga umubu utera Zika kandi ufite ingaruka ku mugore ubwite, gusa mu Mujyi wa Rio de Janeiro ntiharimo Zika nyinshi habayemo no kubikabiriza kuko hari n’ibindi bihugu birimo Zika nka Colombia, ariko byo ntibyavuzwe”.

12.Brazil igihugu cyateye imbere mu mupira w’amaguru

Brazil ni igihugu cyateye imbere mu kugira abakinnyi bakomeye ku isi mu gukina umupira w’amaguru (Football). Gusa si igihugu gifite sitade nyinshi nziza ugereranyije no mu Bwongereza. Imwe muri Sitade ikomeye muri Brazil ni Maracana yubatswe mu mwaka wa 1950, ikaba ishobora kwakira abantu basaga ibihumbi 70.

Kuba Brazil yarateye imbere mu guconga ruhago, abaturage b’iki gihugu bemeza ko babikesha kuba bafite shampiyona (League) ikomeye. Ikindi ni uko umupira w’amaguru muri Brazil wubakiye hasi, aho birya no hino mu gihugu abana baba bakina.

U Rwanda rwari mu bihugu 151 byitabiriye imikino Paralempike yabereye muri Brazil yasojwe kuwa 18 Nzeli 2016.

Aba ni abotsaga injugu ku muhanda ugana Copa Cabana
Abanyegare n’abanyamaguru bagira inzira imwe, aha ni mu gace ka Copa Cabana
Aha baba bakina Beach Volley
Aho bashyira imyanda
Aho Gari ya Moshi inyura
Akayira k’abanyamaguru mu muhanda w’imodoka
Copa Cabana
Dame iba hafi y’umuhanda mu mujyi wa Rio de Janeiro

Hafi y’Inyanja ya Atlantika abantu baba banezerewe
Hafi y’ishusho ya Yezu harimo Chapelle
Ibigori bitetse mu Mujyi wa Copa Cabana bicururizwa ku muhanda
Imodoka zica mu mihanda ya Rio de Janeiro
Imwe mu ishusho igaragara ahaca Gari ya Moshi ishushanyije ku rutare
Inyubako bitirira Copa Cabana
Ishusho ya Yesu ihuruza imbaga muri Brazil mu Mujyi wa Rio de Janeiro
Ishusho ya Yesu
Izi modoka zitwara abagenzi zagenewe umwanya wazo
Komite-Olempike-ya-Brazil
ku musenyi wa Copa Cabana
Maraca Sitade ya mbere muri Brazil yakira abantu benshi niyo yakiriye umuhango wo gutangiza imikino Paralempike no kuyisoza
Muri Gari ya Moshi haba harimo ikarita igaragaza icyerekezo
Ni uku ku munsi w’ikiruhuko biba byifashe
Ntibatinya kuzana imbwa ahacururizwa imbuto mu Mujyi wa Copa Cabana
Tumwe mu tubare two muri Brazil
Uyu ni umuzunguzayi wo kumucanga wa Copa Cabana
Uyu yacuruzaga ibyo kunywa ahantu hatandukanye ahaberaga imikino Paralempike

Leave a Reply

Your email address will not be published. Required fields are marked *

Scroll Up